Þú þýtur af stað á fullri ferð út á malbikið í hlaupaferð dagsins en einmitt þegar þú ert á góðri leið með að slá persónulegt met, gerir maginn vart við að eitthvað sé í ólagi.
Hafirðu lent í einhverju slíku geturðu huggað þig við að fleiri hafa þessa reynslu.
Rannsókn hefur sýnt að 62% hlaupara sem hlaupa 5 km eða lengra hafa lent í því að þurfa að hætta vegna óþæginda í maga.
Ný tilraun sem náði til 46 maraþonhlaupara bendir til að þrýstisokkar (oftast nefndir compressionsokkar upp á ensku) geti komið í veg fyrir þessar óþægilegu þarmahreyfingar.
Til viðbótar benda sérfræðingar á að hollt fæði og mikil vatnsdrykkja hjálpi til við að halda maganum í jafnvægi bæði fyrir hlaupin og eftir þau.
Sokkarnir bæta blóðrásina
Fyrir tilraunina höfðu vísindamennirnir þá tilgátu að óþægindin stöfuðu af því að hlaupið truflaði maga og þarma og gæti jafnvel valdið skaða.
Þess vegna þótti þeim rétt að byrja á að bæta blóðrásina hjá sumum hlaupurum og skoða hvaða áhrif það hefði.
Í tilrauninni voru 23 af 46 maraþonhlaupurum látnir hlaupa í þrýstisokkum og í ljós kom að tiltekið prótín sem bindur iðrafitusýru og kallast I-FABP, mældist í minna magni í blóði þeirra sem hlupu í sokkunum.
Að sögn vísindamannanna er magn I-FABP í blóði vísbending um hversu mikið tjón magi og þarmar verða fyrir á hlaupum.
Meðalhækkun var á magni I-FABP um 38 prósent í blóði þeirra hlaupara sem voru í þrýstisokkum en aukningin var 107 prósent í blóði þeirra hlaupara sem ekki voru í þessum sokkum.
