Öll framleiðum við þennan umrædda vökva og gjarnan nokkra lítra á dag.
Þvag er ómissandi afurð sem gagnast líkamanum við að losa sig við margs konar úrgangsefni.
Það sem margir hins vegar ekki vita er að liturinn á pissinu segir mjög vel til um heilsufar okkar.
Brúnt þvag
![](https://visindi.is/wp-content/uploads/2022/04/brunt-urin-4lRLV7ePhbUzZmBU_GYOJA.jpg)
Þú hefur borðað vænan skammt af rabarbara, bóndabaunum eða jafnvel aloe vera.
Brúni liturinn kann einnig að vera aukaverkun ýmissa lyfjategunda, til dæmis hægðalyfja ellegar sýklalyfja.
Í alvarlegri sjúkdómstilfellum kann brúnt þvag að gefa til kynna sjúkdóm í lifur eða nýrum.
Lillablátt þvag
![](https://visindi.is/wp-content/uploads/2022/04/lilla-urin.png)
Já, þú last ekki skakkt. Í einstaka tilvikum getur liturinn í klósettskálinni orðið lillablár.
Litur þessi á rætur að rekja til afar sjaldgæfs sjúkdóms sem kallast purpuraveiki en galli í ensímum veldur því að þeir sem þjást af honum eiga fullt í fangi með að framleiða blóðrauða, þ.e. efnið í blóðkornunum sem sér um að flytja súrefni frá lungum og út í vefi líkamans.
Grænt þvag
![](https://visindi.is/wp-content/uploads/2022/04/gronkacc8al.png)
Grænt piss kann að stafa af vítamínum eða lyfjum. Þá er einnig hugsanlegt að viðkomandi hafi snætt mikið magn af spergilkáli, spergli eða grænkáli.
Tiltekin litarefni í grænu grænmeti hljóta ekki upptöku í líkamanum og ganga þess í stað niður af honum með þvaginu.
Blátt þvag
![](https://visindi.is/wp-content/uploads/2022/04/bla-urin-yPTzkeT9j0ypw2AQYdF9Eg.jpg)
Blái liturinn er einkar sjaldséður.
Blátt piss kann að eiga rætur að rekja til arfgenga barnasjúkdómsins kalkvakaóhófs sem veldur miklu kalkmagni í blóði og kallast manna á meðal einnig „blá-bleiu-heilkennið“.
Bleikt/rautt þvag
![](https://visindi.is/wp-content/uploads/2022/04/giphy-1.gif)
Þegar þessir litir sjást er alvara á ferðum.
Rautt þvag getur stafað af blóði í þvaginu sem kann að vera til marks um ýmsa alvarlega kvilla á borð við stækkaðan blöðruhálskirtil, krabbamein í blöðru eða blýeitrun.
Orsökin kann þó einnig að vera saklausari en svo, ef t.d. viðkomandi er byrjaður á nýjum lyfjum eða hefur hámað í sig rauðrófur eða ber.
Appelsínugult þvag
![](https://visindi.is/wp-content/uploads/2022/04/orange-urin-_pmZl8eNAbVb0BEYHfNxGw.jpg)
Þú hefur sennilega borðað ofgnótt gulróta.
Ávextir og grænmeti sem fela í sér hátt hlutfall af C-vítamíni og karótíni, eiga oft sök á appelsínugulum lit á þvaginu.
Lyfið pýridíum sem oft er notað til að ráða niðurlögum þvagfærasýkingar, kann jafnframt að vera sökudólgurinn.
Hunangslitað þvag
![](https://visindi.is/wp-content/uploads/2022/04/giphy-2.gif)
Þú ættir að skella í þig vatnsglasi eða jafnvel nokkrum glösum.
Það er umbrotsefnið úróbílín sem sér til þess að þvag okkar verður gult á að líta.
Því meira magn sem leynist af úróbílíni í þvaginu, þeim mun meira vatn hefur líkaminn sogað í sig til að hann þorni ekki upp og þvagið verður dekkra.
Litlaust þvag
![](https://visindi.is/wp-content/uploads/2022/04/farvelos-urin-V0jCGB9OjlezKYv9DDyinw.jpg)
Þú hefur sennilega drukkið mikið magn af vatni, áfengi eða koffíni.
Áfengi og koffín koma í veg fyrir að líkaminn geti sogað í sig vökva og fyrir vikið berst meira vatn úr líkamanum með þvaginu.
Gegnsætt, gult þvag
![](https://visindi.is/wp-content/uploads/2022/04/urin-hYMbXc1-F2nGiWEtyhSd9w.jpg)
Þú býrð yfir nægilegu vökvamagni og heilsan er góð!