Tölvuþrjótagengið GoodWill hefur sérhæft sig í að halda tölvuskrám ólíkra fyrirtækja í gíslingu ef fyrirtækin sem lenda í klóm þeirra gera fátæklingum í þjóðfélaginu ekki greiða.
Fyrirtækin sem verða fyrir barðinu á genginu þurfa að hlaða upp sönnunum fyrir þremur ólíkum góðverkum á samfélagsmiðlum ef þeir ætla að gera sér vonir um að endurheimta tölvuskrár sínar en þetta hefur tölvukóði gengisins leitt í ljós.
Aðgengi teymisins GoodWill að tölvuglæpum hefur opnað möguleikann á þvingaðri aðstoð fyrirtækja til handa þeim sem hafa minna handa á milli en gerist og gengur en teymið getur að sama skapi valdið svo miklum usla hjá fyrirtækjunum að hlutabréf þeirra lækka í verði.
Þrenns konar góðverk fyrirtækjanna
Goodwill-teymið styðst við svokallaðan mannúðarlausnarbúnað en þessu mætti best lýsa sem spilliforritum sem dulkóða tölvuskrár og gera þær ólæsilegar með öllu.
Að öllu jöfnu krefjast þeir sem beita þessari aðferð lausnargjalds, gjarnan tuga milljóna króna sem greiddar eru í rafmynt, í skiptum fyrir afkóðunarlykil sem gerir unnt að lesa skrárnar.
Ef fyrirtæki sem fyrir þessu verður ákveður að greiða ekki lausnargjaldið á það á hættu að allar skrár þess, þar á meðal leynileg viðskiptaskjöl, verði annað hvort eyðilögð eða seld hæstbjóðanda.
Í stað þess að krefjast peningagreiðslu fer gengið t.d. fram á að keyptur verði hlýr fatnaður fyrir heimilislausa sem búa meðfram þjóðvegunum í Bandaríkjunum en þúsundir þeirra láta lífið af völdum kulda og vosbúðar ár hvert. Góðverkið skal sannað með ljósmyndum sem birta verður á samfélagsmiðlum, þar sem umrætt fyrirtæki hvetur alla fylgjendur sína til að hjálpa fátækum.
Þegar góðverkið hefur verið innt af hendi á fyrirtækið svo t.d. að bjóða fimm lítilsmegandi börnum undir 13 ára aldri upp á kvöldmat á pítsustað hverfisins. Góðverkið skal svo á nýjan leik staðfest með aðstoð samfélagsmiðla.
Þriðji og síðasti velgjörningurinn er svo fólginn í því að finna og aðstoða fólk sem á í basli með að greiða lyfjareikninginn. Sönnunina skal svo enn og aftur birta á netinu.
Leysi fyrirtækið þessi þrjú verk af hendi með fullnægjandi hætti geta þau verið viss um að endurheimta skrárnar sem tölvuþrjótarnir í GoodWill lögðu hald á.
Engin takmörk fyrir hugmyndaauðginni
Þetta kann að hljóma sem fyrirtakshugmynd að láta auðugt fyrirtæki greiða fyrir grunnþarfir hinna fátæku.
Aðgengi GoodWills minnir einnig svolítið á þátt í dystópísku þáttaröðinni „Black Mirror“ á Netflix, þar sem fólk er þvingað til að fremja bankarán og morð vegna þess að einhver hefur brotist inn í tölvur þess og beitt ólöglegum myndupptökum.
Hugmyndaauðginni virðast engin takmörk vera sett þegar tölvuþrjótar þvinga fyrirtæki til góðra verka gegn því að fá afhentar á nýjan leik tölvuskrár sínar.
Þar sem tölvuöryggismálafyrirtækið CloudSEK hefur einungis nýlega komist á snoðir um GoodWill-lausnargjaldsforritið, núna á vormánuðum, er óvíst hversu mörg fyrirtæki hafa verið krafin um að láta gott af sér leiða til þessa.
300 milljón tilraunir á síðasta ári
Hefðbundinn lausnargjaldshugbúnaður hefur færst mjög svo í aukana, ef marka má tölvuöryggisfyrirtækið SonicWall sem segir að 300 milljónir slíkra tilrauna hafi verið gerðar á heimsvísu á árinu 2021.
Þar sem fyrirtækin upplifa skömm, álitshnekki og hlutabréfahrap í tengslum við rán á skrám þeirra er óvíst hversu mörg fyrirtæki eiga í hlut.
Margir þeirra sem fást við tölvuöryggismál benda á að gerðar hafi verið rösklega 2.000 vel heppnaðar lausnargjaldsárásir í Bandaríkjunum einum á síðasta ári.
Fyrri hluta ársins 2021 námu lausnargjaldstengdar peningagreiðslur einum 80 milljörðum íslenskra króna, ef marka má bandarísku eftirlitsstofnunina FinCEN sem hefur það hlutverk að rekja fjármálaglæpi.
Áður en langt um líður kunnum við að eiga von á að lesa frásagnir af fatnaði til handa fátæklingum, pítsum fyrir börn hinna fátæku, svo og greiðslu lyfjareikninga eða annað í þeim dúr sem fyrirtæki hafa neyðst til að birta á samfélagsmiðlum til að fullnægja kröfum þeirra sem beita fyrirtækin lausnargjaldsárásum.
