Verkjalyfið paracetamol fæst án lyfseðils með fjölmörgum vörumerkjum, t.d. undir nöfnunum Panodil og Paratabs. Nú sýnir nýleg rannsókn frá ríkisháskólanum í Ohio í BNA að efni linar ekki aðeins verki, heldur gerir okkur líka dálítið áhættusæknari.
Vísindamennirnir gerðu tilraunir á meira en 500 manns. Helmingur fékk ráðlagðan skammt af paracetamol en hinn helmingurinn fékk lyfleysu. Innan við klukkutíma var svo mælt hversu fúst fólkið væri til að taka áhættu.
![web_shutterstock_765786226 web_shutterstock_765786226](https://visindi.is/wp-content/uploads/2021/11/web_shutterstock_765786226.png)
Samkvæmt rannsókninni verður t.d. teygjustökk ekki jafn ógnvekjandi eftir að hafa tekið paracetamol.
Þátttakendur voru t.d. látnir blása í blöðru gegn peningaverðlaunum sem hækkuðu eftir því sem blaðran stækkaði en ef hún sprakk fuku verðlaunin. Í ljós kom skýr munur þannig að fólk sem fengið hafði paracetamol blés blöðrurnar meira út.
Líklegri til að leggja allt undir í spilum
Það sýndi sig líka í svörum við spurningum að verkjalyfið gerði þátttakendur viljugri til ógnvekjandi athafna á borð við teygjustökk. Hið sama gilti um tilhneiginguna að leggja allt undir í spilum, svo sem hestaveðhlaupum.
Vísindamennirnir telja að áhrifin geti einnig haft samfélagsleg áhrif. T.d. er fólk með flensu-einkenni líklegt til að taka paracetamol sem er óheppilegt ef það dregur úr skilningi á hættunni á að smita aðra.