Reykingar stuðla að líffræðilegum breytingum tengdum öldrun með sýnilegum einkennum, m.a. á húðinni.
Nú hefur teymi bandarískra og kínverskra vísindamanna sýnt að öldrun eykst mun hraðar ef fólk er einmana eða óhamingjusamt.
Þeir hafa borið saman fjölda mismunandi líkamlegra og andlegra þátta til að sjá hvernig þeir hafa áhrif á líffræðilega öldrun líkamans. Í því sambandi hafa þeir séð að einmanaleiki, ónógur nætursvefn og óhamingjutilfinning hafa umtalsvert meiri neikvæð áhrif á öldrun en reykingar.
Notuðu „öldrunarklukku“ við útreikninga sína
„Líkaminn og sálin eru tengd – það eru helstu skilaboð okkar,“ útskýrir Fedor Galkin sem var einn þeirra sem gerðu þessa nýju rannsókn.
Í tímaritinu Aging-US útskýra vísindamennirnir hvernig þeim tókst að byggja upp stafrænt öldrunarlíkan – eins konar „öldrunarklukku“ – byggt á gögnum sem þeir höfðu safnað árið 2015 frá 4.846 fullorðnum Kínverjum sem var hluti stærri rannsóknar „China Health and Retirement Longitudinal Study“ (CHARLS). Hér skoðuðu þeir alls 16 mismunandi lífmerki í blóði, þar á meðal kólesteról og glúkósa. Auk þess skoðuðu þeir blóðþrýsting, BMI og lungnastarfsemi.
Sjúkdómar gera líkamann eldri
Með því að nota „öldrunarklukkuna“ gátu vísindamennirnir reiknað út öldrun 2.617 einstaklinga með sjúkdóma eins og heilablóðfall, lifrarsjúkdóma og lungnasjúkdóma sem vitað er að stuðla að öldrun líkamans.
Þeir komust að því að öldrun þeirra sem veikjast var lengra komin en hjá 4.451 heilbrigðum, fullorðnum einstaklingum á svipuðum aldri, sama kyni og sem bjuggu við svipaðar aðstæður.
Einmanaleiki hafði mest áhrif
Meðaláhrif hinna ýmsu sjúkdóma urðu til þess að 18 mánuðir bættust við hinn raunverulega aldur einstaklinganna.
Það sem kom hins vegar á óvart voru sálrænu þættirnir. Hér komust þeir að því að fólk sem fann fyrir óhamingju eða einmanaleika hafði bætt að meðaltali 19,8 mánuðum við líffræðilegan aldur sinn. Til samanburðar má nefna að samkvæmt útreikningum „öldrunarklukkunnar“ voru reykingamenn metnir 15 mánuðum eldri miðað við þá sem reyktu ekki og á sama aldri.
LESTU EINNIG
Rannsakendur leggja áherslu á að ennþá séu þetta aðeins líkanareikningar með aðstoð „öldrunarklukkunnar“.
Þeir hafa ekki sannreynt að fólk með sálræn íþyngjandi vandamál eldist í raun hraðar. Það verður því verðugt verkefni til framtíðar að rannsaka hvort þessir líkanareikningar séu réttir með endurteknum prófunum yfir lengri tíma, segja þeir.
