Hvað er snípur?
Kynfæri kvenna samanstanda bæði af innri og ytri hlutum.
Innri hlutarnir eru leggöng, móðurlíf, eggjastokkar og eggjaleiðarar en þau ytri teljast svo vera innri og ytri skapabarmarnir, leggangaopið og ekki hvað síst snípurinn.
Snípinn tengjum við gjarnan við kynferðislega fullnægingu. Líffæri þetta felur í sér mörg þúsund taugaenda og á það til að þrútna út þegar það er örvað.
Snípurinn samanstendur af lítilli húfu og snípslegg. Húfan er það sem við getum komið auga á í ytri kynfærunum en hún er á stærð við venjulega baun.
Hvar er snípurinn?
Snípshúfan er eins konar hnúður þar sem skapabarmarnir mætast að framanverðu. Fyrir neðan snípinn er svo þvagrásin.
Frekari upplýsingar um innri gerð er að finna í öðru atriði listans hér að neðan.
1. Snípurinn gegnir fleiri hlutverkum en að veita ánægju
Vísindamenn hafa löngum vitað að örvun snípsins hrindir af stað líffræðilegum breytingum sem geta aukið líkur á getnaði.
Ef marka má vísindaskýrslu frá árinu 2019 er um að ræða eftirtaldar breytingar:
- Hækkaður blóðþrýstingur og hærri púls sjá til þess að bæta blóðflæði til legganganna.
- Aukin bleyta í leggöngin gerir það að verkum að samfarir verða sársaukalausar.
- Hærra sýrumagn í leggöngum (blóðgas pO2) sem m.a. leiðir af sér meiri hreyfanleika sæðis.
- Á að einhverju leyti þátt í að gera sýrustigið í leggöngunum hlutlaust.
- Hægir á sæðisflutningi frá leggöngunum.
- Hækkar hitastig legganganna sem veldur meiri örvun hjá karlmanninum.
Lengi vel var talið að eina hlutverk snípsins væri að veita kynferðislega nautn en nýlegar rannsóknir sýna að hann á einnig þátt í að getnaður geti átt sér stað.
2. Snípurinn er efsti hluti ísjakans
Sá hluti snípsins sem er sýnilegur er aðeins toppurinn á ísjakanum.
Mest allur hluti hans er falinn inni í líkama konunnar og er alls átta cm á lengd. Lengdin samsvarar nokkurn veginn lim án stinningar.
Snípurinn er eins og ísjaki undir húð konunnar.
3. Næmari en kóngur karlmannsins
Snípurinn er með 8.000 taugaenda og er svo næmur að ekkert annað mennskt líffæri kemst með tærnar þar sem hann er með hælana.
Til samanburðar má geta þess að kóngurinn á getnaðarlim karls hefur aðeins yfir að ráða 4.000 taugaendum.
8.000 taugaendar tákna að snípurinn er næmasta líffæri mannslíkamans
4. Snípurinn stækkar alla ævi
Líkt og við á um eyru og nef hættir snípurinn aldrei að stækka. Þegar konur komast á breytingaskeið er snípur þeirra um fimmfalt stærri en þegar þær voru unglingar.
5. Lífið hefst ekki með sníp
Vísindamenn töldu árum saman að öll fóstur væru kvenkyns í upphafi og að við værum fyrir vikið öll fyrst útbúin sníp óháð því hvers kyns við yrðum.
Rannsóknir hafa hins vegar leitt í ljós að sú er ekki raunin. Líffræðingar hafa sýnt fram á að kyn stúlkufóstra ræðst af próteininu COUP-TFII, líkt og við á um drengjafóstur.
Kynin hefja fyrir vikið ekki ævina sem kvenkynsfóstur, heldur grundvallast þau bæði á sömu kynlausu fyrirmyndinni.
6. Veitir flestar fullnægingar
Greining á alls 33 rannsóknum sem gerðar höfðu verið á undanförnum 85 árum leiddi í ljós að á bilinu 50% til 75% allra kvenna fá einungis fullnægingu eftir að snípurinn hefur verið örvaður.
Þetta táknar með öðrum orðum að „hefðbundnar“ samfarir leiða sjaldnast til þess að konur fái fullnægingu.
Á bilinu 50 til 75% allra kvenna fá því aðeins fullnægingu að snípurinn hafi verið örvaður.
7. Samdrættir í snípnum
Meðan á fullnægingu stendur dregst snípurinn saman nokkrum sinnum. Fullnæging í snípnum veldur venjulega á bilinu þremur til sextán samdráttum sem hver stendur yfir í 10 til 30 sekúndur.
Snípurinn getur dregist saman. Ekki óáþekkt skjaldböku sem dregur höfuðið inn í skjöld sinn.
8. Staðsetning skiptir máli fyrir fullnægingu
Rannsóknir hafa leitt í ljós að því nær sem snípurinn er leggangaopinu, þeim mun auðveldar reynist það konum að fá fullnægingu. Margar konur hafa gert tilraunir með að láta færa snípinn nær leggangaopinu með skurðaaðgerð í leit þeirra að fullnægingu en hafa því miður ekki haft erindi sem erfiði.
Þekktasta kona sögunnar sem lét gera á sér slíka aðgerð var prinsessan Marie Bonaparte, langafabarn Luciens bróður Napóleóns.
Marie Bonaparte prinsessa lét gera á sér aðgerð í leggöngum sem mistókst.
9. Snípurinn fær stinningu
Snípurinn getur orðið stinnur þegar konur eru örvaðar kynferðislega, ekki síður en reður karlmannsins.
Kynfæri kvenna geta þrútnað út líkt og kynfæri karla og stafar stækkunin af auknu blóðflæði í tengslum við kynferðislega örvun.
10. Stærsti snípur heims
Öll spendýr eru með sníp en þó er hann stærstur hjá hýenum miðað við eigin líkamsstærð dýranna.
Snípur þessara hrææta líkist getnaðarlim. Hann er langur, lafir utan líkamans og getur orðið stinnur.
Hýenutíkur eru meira að segja með op á enda snípsins sem þær hafa þvaglát um, fæða afkvæmi sín gegnum og eðla sig með.
11. Við höfum aðeins haft þekkingu á snípnum í 25 ár
Snípurinn hefur lengi verið vísindamönnum ráðgáta.
Það var ekki fyrr en árið 1998 sem ástralska þvagfærasérfræðingnum Helen O’Connell tókst að kortleggja líffærafræði snípsins. Þetta tókst henni að gera með aðstoð segulómunar á kynfærum nokkurra kvenna.
Allar þær myndir sem birtar hafa verið af sníp eru í raun og veru einföldun því ógerningur er að nota tvívíða mynd til að lýsa öllu líffærinu sem samanstendur af mörgum lögum.
Líffærafræði snípsins sem líkan í þrívídd.
12. Orðið þýðir lykill
Læknisfræðilega heitið „clitoris“ á rætur að rekja til forngrísku. Málvísindafólk telur að orðið sé leitt af orðinu „kleitoris“ sem notað var yfir litla hæð. Önnur skýring er sú að orðið hafi þýtt „lykill“.
Tengingin á þá að vera sú að snípurinn sé lykillinn að kynlífi konunnar.
