Menn sem eru í konuleit eru að öllu jöfnu ekki sérlega spenntir fyrir konum með mikla menntun og góða greind og kjósa þess í stað oft konur með minni menntun. Tilhneigingin verður enn greinilegri ef konurnar reynast vera greindari en mennirnir sjálfir.
Í tilraun einni sem gerð var í Hollandi árið 2021 útbjuggu vísindamenn alls 12 gabblýsingar á konum sem þeir svo birtu á þekktri stefnumótasíðu þar í landi.
Einstaklingarnir á bak við tilbúnu mannlýsingarnar, alls sex konur og sex karlar, voru allir um þrítugt, reyktu ekki og í góðu líkamsástandi. Munurinn var einungis fólginn í því hversu laglegir einstaklingarnir voru og hversu mikilli menntun þeir höfðu yfir að ráða.
Alls 2.700 sakleysingjar sem höfðu áhuga á að kynnast tilvonandi maka, fengu skilaboð frá „gabbmannlýsingunum“ tólf.
Engan skyldi undra að laglegustu einstaklingarnir fengu flest svör, bæði frá körlum og konum en dæmið snerist hins vegar við þegar kom að menntuninni.
Gabblýsingar kvenna sem lokið höfðu „framhaldsskóla“ fengu 25% fleiri svör en konurnar sem sagðar voru vera með háskólamenntun, óháð því hvort karlarnir sjálfir voru vel menntaðir eða með litla menntun.
Munur á draumum og veruleika
Sex viðamiklar tilraunir sem gerðar voru í Bandaríkjunum árið 2015 leiddu í ljós að karlmenn voru oft ekki meðvitaðir um það sjálfir hverjar óskir þeirra væru hvað væntanlegan maka áhrærði.
Í fyrri hluta tilraunarinnar létu vísindamennirnir hóp karlkyns háskólanema taka stutt greindarpróf. Mönnunum var síðan tjáð að þeir ættu nú að hitta háskólanema af hinu kyninu sem væri annars staðar í byggingunni og hefði tekið sama próf.
Þegar karlarnir höfðu fengið prófniðurstöður sínar voru þeir spurðir hvort þá fýsti að hitta konur með meiri eða minni greind en þeir sjálfir höfðu yfir að ráða.
Bróðurpartur karlmannanna svaraði á þann veg að þeim fyndist áhugaverðast að kynnast konum sem hefðu yfir að ráða meiri greind en þeir sjálfir. Á þessu stigi vissu karlarnir ekki hvernig konurnar litu út.
Raunveruleikakönnun
Í næsta hluta tilraunarinnar var aftur lagt greindarpróf fyrir þátttakendurna og körlunum var aftur sagt að innar á ganginum væri að finna kvenkyns háskólanema sem væru að taka sama próf. Að þessu sinni fengu mennirnir þó að hitta konurnar.
Í þetta sinn urðu viðbrögð karlanna hins vegar allt önnur.
Karlmönnunum sem þátt tóku í tilrauninni var öllum sagt að þeir hefðu fengið 12 stig af 20 mögulegum á prófinu og að konurnar sem þeim byðist að hitta hefðu ýmist fengið 18 stig eða sex. Einkunnagjöfin var tilbúningur einn.
Karlarnir voru beðnir um að hafa með sér stól inn í salinn þar sem til stóð að hitta konurnar. Vísindamennirnir veittu því athygli að margir karlanna sem áttu að hitta konur með meiri greind staðsettu stóla sína annað hvort langt frá konunum eða þá færðu stólana frá þeim meðan á samtalinu stóð.
Niðurstaðan var sú að afstaða karla til greindra kvenna væri mjög jákvæð áður en til kastanna kom, á meðan þeir ímynduðu sér fund þeirra með konunum. Þegar hins vegar að úrslitastund kom leið körlunum oft líkt og þeir væru síður „karlmannlegir“ og sýndu hugsanlegu ástarsambandi jafnframt minni áhuga.
Á hinn bóginn voru stólarnir staðsettir nálægt þeim konum sem körlunum hafði verið tjáð að hefðu fengið lægri einkunn á greindarprófinu.
Gamaldags gildi fyrir ný kynjahlutverk
Útlitið skiptir sköpum hvað bæði kynin áhrærir. Rannsóknir hafa jafnframt leitt í ljós að vel menntaðar konur, andstætt við karlana, kjósa sér oft maka sem er með viðlíka menntunarstig og þær sjálfar eða jafnvel meiri menntun.
Konur mennta sig í síauknum mæli og vísindamenn draga þá ályktun að makaval karla og kvenna hafi ekki þróast í samræmi við þetta og að vel menntuðum konum reynist fyrir vikið stöðugt torveldara að kynnast maka.
