Árlega smitast 390 milljónir manna af svonefndri beinbrunaveiru (dengue) og hjá Alþjóðaheilbrigðisstofnuninni WHO er dengue-veikin talin meðal tíu ógnvænlegustu sjúkdóma heims.
Smitið berst með moskítóflugum og veldur einkennum sem líkjast inflúensu en getur líka valdið lífshættulegum blæðingum. Árlega deyja um 20.000 manns úr sjúkdómnum.
![](https://visindi.is/wp-content/uploads/2023/05/myg.jpg)
Vísindamenn hafa sýkt mörg þúsund moskítóflugur með bakteríu sem vinnur bug á dengue-veirunni. Aðferðin hefur dregið talsvert úr smiti.
Samtökin World Mosquito Program hafa frá 2011 gert tilraunir með að sýkja flugurnar sem bera smitið með bakteríu sem vinnur bug á veirunni í flugunni sjálfri.
Bakterían kallast Wolbachia og hún tekur til sín mikilvæg efni, t.d. kólesteról sem veiran þarf á að halda til að fjölga sér.
Sýkt moskítófluga dreifir því ekki veirunni. Þegar flugurnar fjölga sér berst bakterían áfram til næstu kynslóðar og veiran verður þannig á endanum heimilislaus.
Aðferðin hefur einn veikleika
Í ýmsum löndum hafa verið gerðar tilraunir í mjög stórum stíl með því að sprauta Wolbachia í mikinn fjölda moskítóeggja sem síðan voru látin klekjast. Nú hafa samtökin birt fyrstu niðurstöður sínar.
Á svæðum í Brasilíu og Indónesíu hefur tekist að fækka dengue-tilvikum um allt að 76%.
Því miður sýna niðurstöðurnar líka að á mjög heitum svæðum, t.d. í Víetnam, flyst bakterían ekki nógu vel milli kynslóða.
Vísindamennirnir reyna nú að ráða bót á þessum vanda með því að rækta fram nýjar gerðir bakteríunnar sem þoli hitann betur.