Það er vel mögulegt að hafa ófæddan tvíbura í líkamanum. Heilkennið kallast á latínu fetus in fetu, og bein þýðing væri „fóstur í fóstri“. Það er hins vega afar sjaldgæft og kemur líklega aðeins fram í um það bil einu af hverjum 500.000 tilfellum.
Heilkennið kemur fram þegar frjóvgað egg skiptist í tvennt, sem leiðir venjulega til eineggja tvíbura. En í sumum tilfellum og af óþekktum ástæðum, umvefur annað fóstrið hitt og dregur það í líkamann sinn.
Fóstrið gleypir sinn eigin tvíbura
Fyrirbærið fetus un fetu kemur fram snemma á fósturstiginu, þegar frjóvgað egg hefur skipt sér í tvennt.
![](https://visindi.is/wp-content/uploads/2022/08/trin1-ufoedt-tvilling.jpg)
1. Klofnun skapar tvíbura
Þegar eggfruma skiptir sér á fyrstu 14 dögum eftir frjóvgun er niðurstaðan tvö egg sem innihalda eins DNA. Undir venjulegum kringumstæðum verða til eineggja tvíburar.
![](https://visindi.is/wp-content/uploads/2022/08/trin2-ufoedt-tvilling.jpg)
2. Eitt egg étur hitt
Af óþekktum ástæðum fer eitthvað úrskeiðis við skiptingu eggfrumunnar. Annað eggið umvefur hitt og niðurstaðan verður sú að annar tvíburinn hefur tekið hinn inn í líkama sinn. Þetta er sem betur fer mjög sjaldgæft.
![](https://visindi.is/wp-content/uploads/2022/08/trin3-ufoedt-tvilling.jpg)
3. Falið fóstur verður að sníkli
Síðar í meðgöngunni fær tvíburafóstrið næringu frá hýsiltvíburanum og lifir því sem sníkill. Oftast stöðvast þróun sníkilsins á fyrstu þremur mánuðum meðgöngu.
Hið fangaða fóstur lifir síðan sem sníkill sem fær næringu úr blóði tvíbura síns. En venjulega gefst sníkillinn upp á fyrstu þremur mánuðum meðgöngunnar.
Algengt er að tvíburasníkillinn sé staðsettur í magasvæði hýsils síns, nánar tiltekið fyrir innan lífhimnuna, en hann getur líka sest að t.a.m. í heila eða brjósti.
Fóstrið stendur út eins og æxli
Í níu af hverjum tíu tilfellum uppgötvast hið óþroskaða fóstur áður en hýsiltvíburinn verður eins og hálfs árs gamall, sést hugsanlega sem æxli eða að röntgenmyndir afhjúpa það. Í sumum tilfellum sést sníkillinn í ómskoðun á meðgöngu.
![](https://visindi.is/wp-content/uploads/2022/08/ufoedt-tvilling.jpg)
Óþroskaður tvíburi í líkamanum er oftast staðsettur í kviðarholinu. Hann getur verið haft vísi að útlimum (1) og líffærum (2), en hefur aldrei neinn heila.
Fóstur í fóstri (fetus in fetu) getur vegið frá örfáum grömmum upp í tvö kg og lengdin er venjulega á bilinu 3 til 25 sentímetrar. Fóstrið getur verið með beinagrind, húð, innri líffæri og ef til vill líka vísi að handleggjum eða fótum, en það er alltaf án heila.