Slátrun Bandaríkjamanna á 350 – 500 borgurum árið 1968 var einungis einn af mörgum stríðsglæpum þeirra í Víetnamstríðinu. En röð afhjúpandi mynda vöktu athygli almennings í Bandaríkjunum og andúðin á stríðinu jókst hröðum skrefum.
Um 100 bandarískir hermenn héldu þann 16. mars 1968 inn í þorp sem nefndist My Lai. Íbúar höfðu fyrirfram fengið skipun um að yfirgefa staðinn þannig að Bandaríkjamenn litu svo á að allir sem væru ennþá í bænum væru meðlimir andspyrnuhreyfinga kommúnista, Viet Cong.
Hermennirnir söfnuðu öllum sem þeir fundu saman í miðju þorpinu en það voru einkum konur, börn og aldraðir. Sjónarvottar hafa síðan lýst því hvernig sumir Bandaríkjamenn hófu skyndilega að skjóta á fólkið og síðan gerðu fleiri slíkt hið sama.
Stríðsljósmyndari skráði fjöldamorðin
Í kjölfarið á þessu voðaverki kom fram skýrsla þar sem sagt var að 128 Viet Cong-uppreisnarmenn og 22 borgarar hafi látið lífið í aðgerðinni. En síðan tók orðrómur að berast út, fyrst meðal hermanna í Víetnam og síðar í BNA.
Bandarískur liðsforingi staðhæfði árið 1970 að árásir, eins og sú sem átti sér stað í My Lai, hafi átt sér stað í hverjum mánuði árin 1968 og 1969. En það reyndist hægt að skrásetja þetta blóðbað því að ljósmyndari hersins hafði tekið myndir af líkhrúgunum. Þær voru notaðar í baráttunni gegn stríðinu heima fyrir í BNA.
Herinn reyndi að þagga málið niður
Bandarískir hershöfðingjar urðu að viðurkenna stríðsglæpinn.
16.mars 1968
Hermenn missa vitið
100 hermenn ráðast á My Lai og drepa milli 350 og 500 íbúa.
13.desember 1968
Ódæðið spyrst út
Bandaríski hershöfðinginn og síðar utanríkisráðherrann Colin Powell lætur gera málamyndarannsókn. Hann staðhæfir að ekkert blóðbað hafi átt sér stað.
Mars 1969
Vitni skrifar til stjórnmálamanna
30 öldungadeildarþingmenn fá sendar lýsingar hermanns af blóðbaðinu. Flestir velja að hundsa bréfið.
12.nóvember 1969
Sagan blossar upp í fjölmiðlum
Blaðamaður grefst fyrir um málið og lýsir því í fréttaskeyti.
24. nóvember 1969
Herinn rannsakar á ný
Umfjöllun fjölmiðla neyðir herinn til að hefja nýja rannsókn. Í þetta sinn viðurkennir hann dráp á 175 – 200 borgurum og sú tala hækkar síðan í 347.
17. nóvember 1970
Réttarhöld hefjast
26 hermenn eru ákærðir fyrir ódæðið eða tilraun til að leyna sannleikanum.
29. mars 1971
Dómur fellur
Herdómstóll dæmir einn mann, William Calley lautinant sekan.
Blóraböggull á bak við lás og slá
William Calley lautinant skildi ekki ákæruna á hendur sér. Hann hafði jú bara gert skyldu sína: „Ég fékk skipun um að drepa óvininn. Það var verkefni mitt þennan dag“.
Hann var dæmdur til nauðungarvinnu ævilangt. Andstæðingar stríðsins voru verulega ósáttir við að hann einn yrði dæmdur en Nixon forseti náðaði hann eftir þrjú ár.
