Hvers vegna eru vöðvarnir aumir tveimur dögum eftir æfingu?

Ég tók verulega á því í ræktinni í fyrradag og núna tveimur dögum síðar eru vöðvarnir stífir og aumir. Hvers vegna finn ég meira fyrir vöðvunum í dag en strax eftir æfinguna?

BIRT: 07/02/2023

LESTÍMI:

2 mínútur

Ekkert er óeðlilegt við að fá verki í vöðvana eftir stranga æfingu. Eymslin gera að öllu jöfnu fyrst vart við sig hálfum sólarhring eftir æfingu og ná hámarki eftir 24-72 klukkustundir.

Vísindamenn greinir á um hvað veldur síðbúnum verkjum í vöðvum. Áður fyrr tíðkaðist að skýra eymslin með mjólkursýru í vöðvunum en svo virðist sem sú kenning eigi ekki við rök að styðjast.

Í dag telja vísindamenn skýringuna vera þá að síðbúin eymsl í vöðvum eigi rætur að rekja til ástands í vöðvunum sem líkja mætti við bólgu og sem myndast vegna skemmda í vöðvatrefjum sem sjást ekki með berum augum.

Strekktir vöðvar verða aumari

Vöðvatrefjar eru einkum viðkvæmar fyrir örskemmdum þegar við leggjum stund á svonefnda ósammiðja vöðvaáreynslu, þar sem reynt er á vöðvana á meðan þeir eru strekktir. Rannsóknir hafa einnig sýnt að eymslin geta stafað af skaða í bandvefnum umhverfis vöðvana.

Viðgerðin er kvalafull

Að æfingu lokinni þyrpast ónæmisfrumurnar saman til að lagfæra vöðvaskemmdirnar. Á meðan þær starfa virkjast enn fremur taugafrumurnar.

1. Þjálfun skaðar vöðvann

Styrktarþjálfun veldur vart sýnilegum meiðslum á vöðvatrefjum og bandvef. Það eru einkum svonefndar ósammiðja æfingar með alveg strekktum vöðvum sem gera það að verkum að trefjarnar verða viðkvæmar fyrir meiðslum.

2. Frumur gera við skemmdirnar

Ónæmisfrumur á borð við daufkyrninga og átfrumur streyma til vöðvans í því skyni að gera við skemmdirnar. Ferli þetta leysir úr læðingi ýmiss konar bólgumyndandi efni.

3. Bólga gefur til kynna sársauka

Efni þessi og virkni ónæmisfrumnanna örva taugafrumur umhverfis vöðvann. Taugafrumurnar senda sársaukaboð til heilans sem skynjar vöðvaeymslin.

Óþekktar æfingar, svo og mikil, ströng þjálfun, hafa yfirleitt í för með sér síðbúin vöðvaeymsl. Þegar svo vöðvarnir laga sig smám saman að æfingunum, minnka eymslin.

Erfitt er að komast hjá því að fá síðbúin eymsl þegar vöðvunum er beitt í nýjum æfingum. Með því að gera réttar ráðstafanir, m.a. með því að drekka nóg af vatni og hita upp fyrir æfingar, er unnt að draga úr eymslunum.