Hægriöfgahópurinn Ku Klux Klan (KKK) var stofnaður árið 1865 af fyrrum Suðurríkjahermönnum eftir borgarastríðið í Bandaríkjunum.
Markmiðið með samtökunum var að endurheimta yfirráð hvítra í Suðurríkjunum og svipta blökkumenn réttindum þeirra. Aðferðin við að ná þessu fram fólst í ofbeldi og morðum á svörtum, svo og hvítu fólki sem KKK álitu vera svikara.
Settar voru á laggirnar deildir í öllum ríkjum suðursins og eru félagarnir taldir hafa verið um 550.000 þegar samtökin voru leyst upp með lögum árið 1871.
Árið 1915 risu samtökin aftur upp úr öskustónni og töldust þá innflytjendur, gyðingar og kaþólikkar einnig meðal óvina þeirra.
Endurfæðingin átti ekki hvað síst rætur að rekja til kvikmyndarinnar „The Birth of a Nation“ (1915), þar sem upprunalegu samtökin voru vegsömuð og þaðan sem hugmyndin um hvítu hetturnar og brennandi krossinn einnig er sprottin en þetta hvort tveggja áttu KKK eftir að verða þekkt fyrir.
Nýju samtökin höfðuðu til breiðari hóps en þau fyrri og þeim tókst að laða að sér um fimm milljón félaga áður en samtökin urðu gjaldþrota vegna skattaskuldar árið 1944.
Sjálfstæðar deildir héldu hins vegar velli og fengu byr undir báða vængi á sjöunda áratug síðustu aldar sem blóðug andstæða við baráttu þeldökkra fyrir borgararéttindum.
Þegar þar var komið sögu skorti KKK eiginlega miðstjórn og hefur síðan starfað sem litlar sjálfstæðar einingar síðan.
Sérfræðingar álíta að örfá þúsund félagar tilheyri enn samtökunum í Bandaríkjunum í dag.
