Fyrir meira en 50 árum náði Apollo 11-leiðangurinn til tunglsins og Neil Armstrong og Buzz Aldrin urðu fyrstir manna til að stíga fæti í ryklagið á yfirborðinu.
Fram til 1972 voru farnar fimm mannaðar tunglferðir til viðbótar – en samsæriskenningasmiðir standa samt á því fastar en fótunum að þetta hafi allt saman verið eitt allsherjar gabb.
Kenningarnar byggjast einkum á greiningum á myndum NASA frá tunglinu en gagnrýnendur segja þær sýna manngerða lýsingu, leikmyndir, aukastarfsmann og óraunhæf myndefni.
„Fölsuð fótspor og ljósmyndari“
Fótspor í ryki fölsuð
* Kenning: Sporin eru allt of skýr til að geta verið í tunglryki sem er skraufaþurrt og alveg án vætu.
* Skýring: Tunglryk getur haldið formi án vökva – rétt eins og t.d. talkúmduft á jörðu.
Speglun sýnir aukamann
* Kenning: Speglun á hjálmgleri geimfarans Eugenes Cernan sýnir mann án geimbúnings – starfsmann í upptökuveri.
* Skýring: Maðurinn er geimfarinn Harrison Schmitt sem tók myndina. Bogaform hjálmgluggans gerir speglunina óljósa en skuggi hans er of breiður til að maðurinn sé ekki í geimbúningi.
LESTU EINNIG
Myndbandsupptökur frá tunglinu eru líka notaðar til að sanna samsæriskenningar: Geimfarar virðast hanga í línum og myndin er spiluð hægt til að skapa þá ímynd að geimfararnir séu í veikburða aðdráttarafli tunglsins.
Vísindin sanna að myndirnar eru ekta
Með hjálp vísindanna er hægt að hrekja fullyrðingar samsæriskenningasmiða hverja á fætur annarri.
1 – Fáninn blaktir fyrir vindi
- Kenning: Það er ekkert gufuhvolf á tunglinu en samt blaktir bandaríski fáninn eins og vegna áhrifa af vindi.
- Skýring: Fánanum er haldið uppi með þverstöng efst. Hreyfingin hófst þegar fánastönginni var stungið niður.
2 – Skuggar falla til mismunandi átta
- Kenning: Skuggar falla til margra átta. Það hlýtur að stafa af því að sólin er ekki ljósgjafinn, heldur ýmsir lampar í upptökuverinu.
- Skýring: Ljós kemur frá búnaði geimfaranna og frá jörðu. Ójöfnur í landslagi geta líka platað augað.
3 – Himinninn svartur og án stjarna
- Kenning: Stjörnur ættu að vera sýnilegar á himni en hann er alveg svartur. Þess vegna hljóta myndirnar að vera teknar í stúdíói.
- Skýring: Myndirnar eru teknar meðan sólin skín og stjörnuljós því ekki nógu bjart til að sjást.
Árið 2004 sagði þáverandi forseti Bandaríkjanna, George W. Bush, að Bandaríkjamenn myndu fara aftur til tunglsins en Obama lagði þá áætlun til hliðar árið 2010.
Í augum samsæriskenningasmiða er þetta bara ein sönnun til viðbótar: Fallið var frá áætluninni vegna þess að það er einfaldlega ekki hægt að senda fólk til tunglsins.
LESTU EINNIG
