Til að hægja á gróðurhúsaáhrifum þarf að stöðva losun gróðurhúsalofttegunda. Losun er hægt að fyrirbyggja með því að hætta að brenna kolum, gasi og olíu en við getum líka bundið aftur hluta af þeim koltvísýringi sem þegar er í andrúmsloftinu.
Í Skotlandi er nú verið að undirbúa heimsins stærstu hreinsistöð. Hún á að soga til sín eina milljón tonna af koltvísýringi árlega, jafnmikið og skógur með 40 milljón trjám.
Hreinsistöðin á að vinna milljón tonn af koltvísýringi úr loftinu árlega og verður stærsta stöð þessarar gerðar í heiminum.
Í stöðinni verður efnaskiptaferli notað er til að binda koltvísýring. Loft verður sogað inn gegnum stórar túrbínur og því síðan veitt yfir stóra plastfleti með hættulausri kalíumhýdroxíðlausn.
Koltvísýringurinn bindur sig við kalíumhýdroxíðið og myndar sölt. Þéttni koltvísýrings er svo aukin og söltin má pressa saman í pilluform. Pillurnar verða brenndar og koltvísýringnum safnað í þrýstikúta en önnur efni úr upplausninni verða skilin frá og notuð aftur til að safna meiri koltvísýringi.
Koltvísýringnum á að koma fyrir í kalksetlögum djúpt í jörðu. Með milljón tonna árlegri afkastagetu jafnast hreinsistöðin á við 40 milljón trjáa skóg. Slíkur skógur myndi þekja 400 ferkílómetra en skoska hreinsistöðin tekur nokkur þúsund fermetra.
Staðsetning hefur ekki verið endanlega ákveðin en fyrirtækið Carbon Engineering reiknar með að stöðin verði komin í notkun 2026.
Til samanburðar á Carbfix-bindistöðin við Hellisheiðarvirkjun að fanga um 34.000 tonn á ári. Miklu stærri hreinsistöð er þó einnig í undirbúningi hérlendis.
