Ný uppgötvun getur gert kleift að ákveða kyn barns fyrirfram.
Með rannsóknum á sáðfrumum músa hafa japanskir vísindamenn hjá Hírósímaháskóla fundið áður óþekktan mun á sáðfrumum með X-litning og þeim sem bera Y-litning.
Í sáðfrumum með X-litning fundust m.a. 18 gen sem kóða fyrir prótínum á yfirborði sáðfrumunnar. Þessi gen eru óvirk í sáðfrumum með Y-litning.
Kapphlaup flokkaði sæðisfrumurnar
Vísindamennirnir blönduðu nú þykkni með sameindum sem binda sig við prótínin og létu síðan sáðfrumur synda þar í gegn.
Þykknið seinkaði frumum með X-litning talsvert en Y-litningafrumurnar fóru mun hraðar í gegn.
Það þarf því ekki annað en eitt kappsund gegnum slíkt þykkni til að flokka sáðfrumur eftir kyni og vísindamennirnir segja aðferðina bæði ódýra og skaðlausa, þar eð engin hætta er á að litningurinn sjálfur skaddist.
Aðferðin hægir á sáðfrumum með X-litning og þær flokkast því auðveldlega frá Y-litningafrumum.
Það er reyndar ekki tilgangur vísindamannanna að mannfólkið noti aðferðina til að geta öðlast fullvissu um að eignast annað hvort dreng eða stúlku, heldur er ætlunin að beita henni við ræktun húsdýra.
Sumir nautgripabændur vilja t.d. helst bara fá kvígukálfa, þar eð þeir veðja á mjólkurframleiðslu en aðrir vilja fá nautkálfa sem mynda meiri vöðva og þar með kjöt.
Svínaræktendur kjósa flestir gyltur þar eð nauðsynlegt er að gelda gelti á ungum aldri til að forðast aukabragð af kjötinu. Vísindamennirnir vonast sem sagt til að aðferðin leiði af sér mannúðlegri húsdýrarækt.
