Þau geta verið klaufaleg, önnur vinsamleg og enn önnur tilfinningaleg.
Til eru ýmis blæbrigði faðmlaga og við erum ekki öll jafn viljug að faðma fólk.
Svo kom kórónuveiran og neyddi okkur öll til að vera spör á alls kyns faðmlög, svo ekkert var við því að segja þótt ýmsa var farið að lengja eftir góðu, þéttu faðmlagi.
Ef marka má vísindalegar rannsóknir hafa faðmlög ýmislegt gott og gagnlegt í för með sér fyrir heilsu mannanna.
1. Faðmlag gott fyrir hjartað
Sumir segja að þeim hlýni um hjartarætur þegar þeir eru faðmaðir innilega.
Færri vita þó sennilega að faðmlög og innileg snerting virka beinlínis sem hjartalyf.
Tilraun vísindamanna, við m.a. Chapel Hill háskólann í Norður-Karólínu, leiddi í ljós að tiltölulega skammvinn faðmlög geta haft jákvæð og verndandi áhrif á heilbrigði hjartans.
Faðmlag og snerting makans stuttu fyrir streituvaldandi aðstæður geta nefnilega lækkað blóðþrýstinginn og hægt á hjartslætti svo um munar.
2. Faðmlög vernda gegn sjúkdómum
Í tilraun einni sem gerð var við Carnegie Mellon háskólann í Bandaríkjunum tókst að sanna að tíð faðmlög geta varið okkur gegn kvefi og öðrum kvillum.
Vísindamennirnir spurðu rösklega 400 þátttakendur rannsóknarinnar hversu oft þeir hefðu verið faðmaðir á tveggja til þriggja vikna tímabili og báru síðan niðurstöðurnar saman við viðnámsþrótt þeirra gagnvart sjúkdómum.
Rannsóknin leiddi í ljós að tíð faðmlög geta varið okkur gegn sjúkdómum og sýkingum, auk þess að milda sjúkdómseinkenni.
3. Faðmlög losa um hamingjuefni
Tilraunir hafa sýnt að almennilegt faðmlag, helst lengur en 20 sekúndur, getur valdið því að ofgnótt svonefndra gleði- og kærleiksefna myndast í heila.
Eitt þessara efna er hormónið oxýtósín sem sumir kalla „knúshormónið“.
Oxýtósín er myndað í undirstúku heilans og er m.a. þekkt fyrir að draga úr framleiðslu streituhormónsins kortísóls og fyrir að stuðla að langvarandi félagstengslum milli þeirra sem faðmast eða snerta húð hvers annars með öðrum hætti.
Karlar eru með minna magn af oxýtósíni í heila en konur og fyrir vikið hafa rannsóknir við Kaliforníuháskóla leitt í ljós að karlmönnum gagnast einkar vel að faðma aðra og að vera faðmaðir.
Önnur hamingjuefni sem myndast við faðmlag eru:
- Serótónín sem sendir boð milli taugafrumna og gegnir mikilvægu hlutverki fyrir skapferli, matarlyst, svefn og minni.
- Dópamín sem myndast í umbunarstöðvum heilans, nucleus accumbens, tengist því beint hvenær okkur líður vel.
- Endorfín sem losna úr læðingi í heila og niður í mænu, hafa þau áhrif að draga úr sársauka og að örva gleði.
4. Faðmlög geta lægt óttann við dauðann
Hræðslan við að deyja getur herjað á alla en þeir sem búa yfir lítilli sjálfsvirðingu óttast dauðann oft meira en aðrir.
Í tilraun einni í VU háskólanum í Amsterdam sem birtist í tímaritinu Psychological Science árið 2014, var sýnt fram á að faðmlög og líkamleg snerting geta dregið úr dauðahræðslu fólks með lítið sjálfstraust. Ef marka má stjórnanda tilraunarinnar, Sander Kool, nægir að snerta lauslega og tilviljanakennt.
