Grafhvelfing í Yahud, staðsett 11 km frá Tel Aviv í Ísrael, hefur vakið alþjóðlega athygli. Í þessari 3.400 ára gömlu gröf reynist vera elsti ópíumfundur heims til þessa.
Gröfin fannst þegar árið 2012 og á þeim tíma töldu fornleifafræðingar að sumar grafargjafirnar gætu hafa innihaldið ópíum. Við hlið hins látna lágu nokkrar krukkur í laginu eins og fræbelgir ópíumvalmúans. Nú hafa frekari rannsóknir staðfest kenninguna.
Fornleifafræðingarnir gera ráð fyrir að ópíumið sem fannst í gröfinni hafi verið ræktað til forna á svæði sem nú er hluti af Tyrklandi. Krukkurnar voru hins vegar framleiddar á Kýpur en ópíum var alþjóðleg söluvara.
Í gröfinni voru krukkur í laginu eins og fræbelgir ópíumvalmúa snúið á hvolf.
Syrgjendur í vímu
Fornleifafræðingar ísraelsku fornminjastofnunarinnar hafa tvær kenningar um hvers vegna hinn látni fékk ópíum með sér í gröfina. Annað hvort áttu þátttakendur í útförinni að reykja ópíum til að lyfta anda hins látna og saman upplifa einhvers konar himnasælu.
„Svo er einnig hugsanlegt að ópíuminu hafi verið ætlað hinum látna, svo hann gæti risið upp úr gröfinni – einhvers konar undirbúningur til að hitta ættingja sína í framhaldslífinu,“ segir dr. Ron Beeri hjá fornminjastofnun Ísrael.
