Gleymdu martröðum og hlakkaðu til ljúfra drauma þar sem þú stjórnar hvað gerist. Það hljómar eins og – já, draumur – en það er í raun hægt að þjálfa sig í að stjórna aðgerðum og atburðarás sem þróast í draumsvefni.
Fyrirbærið kallast skýrir draumar og u.þ.b. 20 prósent fólks hefur upplifað þá. Fólk með skýra drauma er yfirleitt ekki bara gott í að sjá í gegnum drauma sína, heldur er það oft líka betra í að greina og endurspegla raunveruleikann á meðan það er vakandi.
Þessar þrjár aðferðir til að upplifa skýrari drauma eru allar vísindalega sannaðar og þú munt ná bestum árangri með því að sameina þær allar.
1. Skoðaðu raunveruleikann nokkrum sinnum á dag
Rannsóknir hafa sýnt að hæfileikinn til að vera meðvitaður um og stjórna hugsunarferlum sínum er sá sami hvort sem við erum vakandi, okkur dreymir eða erum að nota ímyndunarafl okkar.
Á daginn geturðu því lagt það í vana þinn að greina á milli draums og raunveruleika með því til dæmis að athuga hvort spegilmynd þín lítur eðlilega út, hvort klukkan telji sekúndurnar rétt og hvort þú getir andað þó þú haldir fyrir nef þitt og munn.
Smám saman mun heilinn venjast því að gera sömu raunveruleikaskoðun í svefni, þannig að þú verður meðvitaðri þegar þig byrjar að dreyma og dreymir í kjölfarið skýran draum.
2. Vaknaðu, vertu viss um að þú sért vakandi og farðu svo aftur að sofa
Okkur dreymir meira í lok svefntímans, þegar þörfin á djúpsvefni hefur verið fullnægt. Þess vegna eykur þú líkurnar á skýrum draumum ef þú eykur andlega skerpu þína á þessum tiltekna tíma.
Þú getur gert þetta með því að stilla vekjaraklukkuna á að vekja þig fimm tímum eftir háttatíma og vaka í 30 mínútur áður en þú ferð að sofa aftur. Á meðan þú ert vakandi verður þú að tryggja að þú örvir hugsanir þínar og skynfæri eins og hægt er með því til dæmis að lesa bók, stunda kynlíf eða hugleiða.
Loks þegar þú sofnar aftur í kjölfarið og byrjar að dreyma eru auknar líkur á að þig dreymi skýran draum.
3. Þekktu drauma þína og vertu viðbúinn
Með MILD (Mnemonic Induction of Lucid Dreams) aðferðinni æfir þú þig fyrst í að muna drauma þína og finna svokallað draumamerki sem kemur oft fyrir í draumum en ekki í raunveruleikanum.
Það gæti til dæmis verið að í draumum ratarðu ekki eða kemur eitthvað mikið á óvart sem gerist sjaldan í vöku.
Þegar þú ferð að sofa verður þú að einbeita þér að því að vera meðvitaðri um þetta draumamerki og þú verður að ímynda þér að þegar þú sérð draumamerkið og segir við sjálfa/n þig: „Þetta er draumamerkið mitt, mig dreymir núna og ég er fullkomlega við stjórnvölin.“
