Forsíða Daily Mirror frá árinu 1945

Síðustu dagar Þriðja ríkisins einkenndust af blóðbaði og eyðileggingu. Miklir bardagar geisuðu í Berlín og í rammgerðu loftvarnarbyrgi undir Þinghúsinu í Berlín frömdu Adolf Hitler og Eva Braun sjálfsmorð þann 30. apríl 1945. Þegar aðstoðarforingi Hitlers, Heinz Linge, hafði gengið úr skugga um að bæði væru látin voru líkin borin upp í sundursprengdan garð að baki byggingunum þar sem bensíni var hellt yfir líkin og kveikt í. Eldurinn nægði þó ekki að eyðileggja líkamsleifarnar algerlega og þegar rússneskar herdeildir tóku að láta sprengjum rigna yfir byggingarnar urðu nasistar að gefa frekari líkbrennslu upp á bátinn. Síðar um kvöldið tókst þeim að grafa leifarnar í nærliggjandi sprengjugíg.

Að þessu marki eru flestir sagnfræðingar sammála um framvindu mála en hvað varð síðar um jarðneskar leifar nasistaleiðtogans hefur orðið uppspretta margvíslegra bollalenginga sagnfræðinga.

Ýmsar kenningar eru uppi. Samsærissinnar telja að þetta hafi alls ekki verið Adolf Hitler og Eva Braun sem dóu í byrginu heldur staðgenglar þeirra, en að Evu og Hitler hafi tekist að flýja og verja lífi sínu á leynilegum stað. Einföldustu sagnir herma að rússneskir hermenn hafi aldrei fundið minnstu leifar af Adolf Hitler og Evu Braun, og að jarðneskar leifar þeirra séu enn grafnar í dálítilli fjarlægð norðan við núverandi þinghús.

Önnur tilgáta, sem m.a. sagnfræðingurinn Benjamin Fischer hefur sett á blað, og fleiri fræðimenn hafa gefið nokkurn gaum að, segir að Stalín hafi einsett sér að tryggja að Hitler væri dauður. Því skyldi finna lík hans og fjarlægja og þetta markmið hafi gagnnjósnadeild innan Rauða hersins tekist að uppfylla.

Árið 2002 fékk þýski réttarmeinafræðingurinn Mark Benekke, við heimsókn í Moskvu, að sjá brot úr höfuðkúpu með einni skotholu og tveimur mismunandi tannbrúm, sem samkvæmt rússneskum ríkisskjölum átti að hafa tilheyrt Hitler.

Benekke bar tennurnar saman við fyrri röntgenmyndir og ályktaði að vissulega væri höfuðkúpan Hitlers. Í september 2009 var hún aftur rannsökuð. Í þetta sinn af fornleifafræðingnum Nick Bellatoni sem framkvæmdi einnig erfðafræðilegar greiningar og komst að því að höfuðkúpan væri úr ungri konu.

\"