Við uppgröft á Svalbarða.

Ógnvekjandi skriðdýr sem lifði í sjó á krítartímanum hefur nú fundist á Spitzbergen í Svalbarðaeyjaklasanum. Skepnan telst ekki til forneðlanna (dynosaurus) heldur annarar gerðar sem nefnist pliosaurus. Hér er um að ræða alveg nýja tegund og hugsanlega nýja ætt þessara sjávarskriðdýra. Af steingervingunum má ráða að skepnan hafi verið a.m.k. 15 metra löng og vegið um 45 tonn. Hauskúpan var 3 metra löng og sama gilti um útlimina fjóra. Þetta er því stærsta pliosaurus-skepna sem nokkru sinni hefur fundist.

Það voru vísindamenn frá Oslóarháskóla og Alaskaháskóla sem uppgötvuðu þetta skrímsli. Á grundvelli CT-skönnunar á höfuðkúpunni, telja þeir töluverð líkindi með henni og einum stærsta drápara nútímans, hvítháfnum. Það má því telja sennilegt að veiðiaðferðin hafi verið svipuð, en þessi skepna hefur þó verið mun sterkari. Bitið hefur verið um tífalt öflugra en nokkurs núlifandi dýrs og 2-4 sinnum öflugra en bit grameðlunnar, Tyrannosaurus rex. Á krítartímanum lifði þessi skepna á fiski, dýrum sem minnt hafa á kolkrabba, iktyosaurus-eðlum og smávaxnari ættingjum sínum svo sem langhálsapliosaurus.

Þar eð veðurfar torveldar uppgröft á Svalbarða, hefur þar ekki mikið verið rannsakað og norsku og bandarísku vísindamennirnir eru því sannfærðir um að þar bíði enn margar og spennandi uppgötvanir á sviði steingervingafræðinnar.