Þrátt fyrir að vera 2.100 ára gömul lítur múmían að nafni Lady Dai enn út fyrir að hafa dáið fyrir aðeins örfáum árum.
Í raun er líkami kínversku aðalskonunnar svo vel varðveittur að flestir mjúkvefir líkama hennar eru enn heillegir en þeir rotna yfirleitt á flestum múmíum sem hafa verið jafn lengi í jörðu og Lady Dai.
Gestir á Hunan-héraðssafninu í Kína fara í pílagrímsferð þangað vegna þess að vinsæl hjátrú segir að hin unglega 2.100 ára gamla aðalskonan geymi leyndarmál æskunnar.
Nokkur lög af lakki og silki varðveita hefðarfrúna
Nokkrar kenningar eru til um það hvernig Lady Dai hefur haldið sér svo vel í meira en tvö þúsund ár.
Kínverska aðalskonan sem var uppi á tímum Han-ættarveldisins (frá 206 f.Kr. til um 9 e.Kr.) var umlukin allt að fjórum lökkuðum líkkistum. Ysta kistan var ríkulega skreytt með silkimálverki.
Auk þess var líkami aðalskonunnar vafinn inn í hvorki meira né minna en 18 lög af silki.
Kistan var einnig full af dularfullum glærum vökva sem varð svartur þegar hann komst í snertingu við súrefni. Sumir vísindamenn telja að þetta hafi verið sérstök kínversk jurtablanda til að koma í veg fyrir rotnun á meðan aðra grunar að þetta hafi bara verið líkamsvökvi frá Lady Dai.
Loftþétt kista heldur rotnun í skefjum
Silkið og kisturnar mynduðu sterka vörn gegn örverunum sem seyta ensímum sem kljúfa sameindir líkamans – þannig að líkaminn rotnar.
Kisturnar voru loftþéttar vegna þéttingareiginleika lakksins og mjög lítill hiti og raki komst inn í hinsta hvílustað Lady Dai.
Örverur gátu ekki lifað af þar og það hélt allri rotnun í skefjum.
Múmía Lady Dai er svo vel varðveitt að mikið af mjúkvef líkamans er enn ósnortinn. Það er jafnvel enn storknað blóð í æðum aðalskonunnar sem lést fyrir meira en 2.000 árum.
Fjölskyldugrafreitur fannst undir byggingarsvæði
Lady Dai sem var aðalsheiti konu að nafni Xin Zhui, fannst við uppgröft á byggingarsvæði á sjöunda áratugnum.
Næsta áratug fundu fornleifafræðingar glæsilegan fjölskyldugrafreit nálægt borginni Changsha í Hunan héraði.
Lady Dai og eiginmaður hennar voru grafin þar og í þriðja grafreitnum lá yngri maður sem líklega var sonur eða mágur þeirra.
LESTU EINNIG
Í greftrunarhvelfingunni voru einnig þúsundir gripa frá Han-ættinni, þar á meðal silkiskjöl og innsigluð ílát með fornum jurtalyfjum.
Vel varðveitt lík segir til um líf og dauða
Þegar Lady Dai var fyrst rannsökuð voru líffæri hennar enn heil, liðir sveigjanlegir og hún hafði skýra andlitsdrætti og jafnvel augabrúnir og nefhár.
Hún var enn með storknað blóð í æðum og hárþunn lungnataug varðveittist líka. Þetta hefur orðið til þess að vísindamenn segja að 2.100 ára múmían líti næstum út eins og einhver nýlega látinn á krufningarborði.
Með rannsókn árið 1996 komust vísindamenn einnig að því hvað líklega olli dauða aðalskonunnar.
Þeir fundu 138 ómelt melónufræ í vélinda og maga Lady Dai sem þýðir að hún neytti melónunnar ekki meira en klukkutíma áður en hún dó.
Þeir fundu einnig blóðtappa í æðum hennar, gallsteina og merki um sykursýki, offitu og hátt kólesteról og blóðþrýsting.
Í krufningunni kemur fram að aðalskonan hafi látist fimmtug að aldri af hjartaáfalli eftir ríkulegt líf með miklum feitum mat.
