Kettir eru á mörg hundruð milljónum heimila og teljast til algengustu gæludýra á heimsvísu.
En rétt eins og aðrir í fjölskyldunni geta þessir loðnu vinir okkar orðið veikir og þurft aðstoð við að komast til heilsu aftur. Það getur því verið gott að vita hverju kattaeigendur ættu helst að reyna að taka eftir og fylgjast með og hvað er t.d. bara ummerki um eðlilega öldrun.
Vísindamenn hjá Konunglega dýralæknaháskólanum í London hafa farið yfir heilbrigðisskýrslur 18.249 katta og skráð lista yfir algengustu sjúkdóma sem hrjá enska ketti.
Markmið rannsóknarinnar var að finna algengustu sjúkdóma sem hrjá heimilisketti og komast að því hvernig þessir sjúkdómar skiptast eftir kyni og aldri.
Til þess notuðu vísindamennirnir slembiúrtak og athuguðu gögn um meira en 18.000 ketti af 1.255.130 köttum í stórum enskum gagnagrunni.
Í úrtakinu lentu að sjálfsögðu fjölmörg kattakyn en algengastur var enskur heimilisköttur „British Short Hair“ en þessir kettir voru 3,01% af öllu úrtakinu. Næstur í röðinni var Bengalköttur, 1,22%.
Vísindamennirnir skoðuðu líka heilbrigðisgögn loðna kynþáttarins Maine Coon, persneskra katta og síamskatta sem taldir eru einn af elstu kynþáttum heimiliskatta.
Einn sjúkdómur algengastur
Heilbrigðisskrár dýralækna sýndu að hjá köttunum greindist að meðaltali eitt sjúkdómsástand á ári. Fress og eldri kettir reyndust fremur þjást af fleiri en einum sjúkdómi í einu.
Algengustu sjúkdómar katta í þessari rannsókn reyndust vera tannholdssjúkdómar sem voru 15,23% af öllum greiningum. Ofþyngd þjáði svo 11,58% og 9,23% greindust með það sem vísindamennirnir nefna „almennan tannsjúkdóm“.
Sjáðu listann: Þetta eru algengustu ákomur enskra heimiliskatta.
Listinn byggist á sjúkraskrám dýralækna um 18.249 ketti af ýmsum kattakynjum. Algengastur var þó enski kynþátturinn „British Short Hair“.
- Tannholdssjúkdómar
- Ofþyngd
- Tannsjúkdómar
- Ofvaxnar klær
- Flóabit
- Hjartaflökt
- Þyngdartap
- Uppköst
- Kýli
- Skita
- Ákomur í feldi
- Hor (undirþyngd)
- Sár
- Of hröð efnaskipti
- Krónískur nýrnasjúkdómur
- Lystarstol
- Augnbólgur
- Óskilgreindir sjúkdómar
- Ofnæmi fyrir flóabiti
- Slitgigt
- Blöðrubólga
- Helti
- Ígerð í sári eftir aðgerð
- Hjartsláttartruflanir
- Eyrnabólgur
- Ofdekrun
- Hægðatregða
- Lítil lífsgæði
- Umferðarslys
Það reyndist líka vera verulegur munur eftir kynjum. Læðurnar áttu t.d. fremur á hættu að fá ígerð í sár eftir aðgerð, þær voru oftar ofdekraðar og áttu frekar á hættu ofnæmi fyrir loppubiti, of hröð efnaskipti og ofvaxnar klær.
Fressin voru hins vegar líklegri til að fá tannslíðurhrörnun, lenda í umferðarslysi, fá hjartaflökt, ofþyngd, heltast, fá kýli og skaddast af biti annarra katta.
LESTU EINNIG
Það þarf svo ekki að koma á óvart að aldur reyndist skipta miklu máli varðandi fjölmarga sjúkdóma. M.a. kom í ljós að kettir undir átta ára aldri voru líklegri til að fá sár eftir bit annarra katta, lenda í umferðarslysum, fá flóabit og sáraígerð eftir aðgerð.
Eldri kettir áttu á hinn bóginn fremur á hættu að fá hjartaflökt eða blöðrubólgu og sömuleiðis að heltast.
Sjálfir telja vísindamennirnir að niðurstöðurnar geti auðveldað bæði dýralæknum og kattaeigendum að ákvarða hvernig eigi að veita köttunum sem best lífsskilyrði. Jafnframt vilja þeir undirstrika að hægt sé að koma í veg fyrir útbreiddustu kattasjúkdómana.
