Ljósið frá tugli niðri við sjóndeildarhring fer langa leið um gufuhvolfið. Á þeirri leið dreifist mikið af bláa ljósinu.

Þegar tunglið er niðri undir sjóndeildarhring verður það rauðleitara að sjá en þegar það er hátt á himni. Ástæðan er sú að gufuhvolf jarðar dreifir ljósinu. Dreifingin er misjöfn eftir litum og blátt ljós, sem er á stuttri bylgjulengd, dreifist meira en rautt ljós á lengri bylgjulengd. Þegar tunglið ber lágt yfir sjóndeildarhring þarf ljósið að fara lengri leið gegnum gufuhvolfið áður en það nær augum okkar. Á leiðinni dreifist bláa ljósið til allra átta og það ljós sem nær alla leið er þess vegna talsvert rauðleitt. En sé tunglið hátt á himni fer ljósið mun styttri vegalengd um gufuhvolfið og megnið af bláa ljósinu nær því líka alla leið. Það skapar hvíta litinn.

Sama fyrirbrigði sjáum við hjá sólinni sem verður allt að því hvít þegar hún er hæst á himni, en verður rauðleitari við sólarupprás og sólarlag.