Þegar við smellum fingrum framkvæmir langatöng hröðustu hreyfingu mannslíkamans.
Vísindamenn frá Georgia Institute of Technology í Bandaríkjunum hafa mælt hröðun löngutangar og komist að þeirri niðurstöðu að fingrasmellur sé yfir 20 sinnum hraðari en augnablik.
Höggbylgjur búa til hljóðið
Fingrasmellurinn gerist í þremur áföngum.
Í fyrsta lagi er löngutöng þrýst á þumalfingur, sem byggir upp kraft. Þegar spennan eykst snýst langatöng um 53,5 gráður á eigin ás. Prófið sjálf að undirbúa það að smella fingrum og takið eftir því hvernig tveir ystu liðir löngutangar sveigjast.
Þegar nægur kraftur hefur safnast saman hefst næsti áfangi þar sem þumalfingri er ýtt til hliðar á meðan langatöng rennur framhjá.
7 millisekúndur – svona hratt þýtur langatöng aftur í lófann þegar þú smellir.
Hreyfingin losar uppsafnaðan kraft sem leiðir til mikillar hröðunar á löngutöng sem smellur í lófann á aðeins sjö millisekúndum.
Hreyfing löngutangar heldur áfram þar til hún snertir lófann. Höggið skapar veikar höggbylgjur sem heyrast sem einkennandi smelluhljóð.
Mannsfingur eru fullkomnir til að smella þeim
Tilraunir rannsakenda sýndu einnig að núningur milli fingra og geta fingra til að þrýsta saman, sem kallast þjöppunarhæfni, skiptir miklu máli fyrir því að smella saman fingrum.
Fingur mannfólks eru hvorki of harðir né of mjúkir. Hægt er að þrýsta þeim aðeins saman en ekki of mikið og eru því hentugir til að búa til fingrasmelli.
