Samkvæmt Alþjóðaheilbrigðismálastofnuninni (WHO) er áttundi hver einstaklingur í heiminum með einhvers konar geðröskun og fæstir hafa aðgang að nauðsynlegri læknismeðferð. Viðamikil vísindaleg úttekt á nærri 100 rannsóknum með samtals 128.119 sjúklingum hefur sýnt fram á að e.t.v. er til góður valkostur við hefðbundnar meðferðaraðferðir.
Í rannsókninni, sem birtist í British Journal of Sports Medicine, er bent á að hreyfing geti haft góð áhrif á andlegri heilsu. Lengi hefur verið vitað að hreyfing hefur jákvæð áhrif á sálarlífið, en nýja safngreiningin, sem er sú umfangsmesta sinnar tegundar, leiðir í ljós að hreyfing er jafn áhrifarík og jafnvel betri en sálfræðimeðferð og læknismeðferð (lyfjameðferð) í upphafi meðferðar.
Styrktarþjálfun best gegn þunglyndi
„Það er alkunna að líkamleg áreynsla hjálpar geðheilsu,“ útskýrir einn vísindamannanna að baki rannsóknarinnar, Ben Singh, frá háskólanum í Suður-Ástralíu
„En þrátt fyrir víðtæka vitneskju um gildi hreyfingar virðist hún ekki mikið notuð sem upphafsmeðferð. Greining okkar sýnir að líkamleg áreynsla getur dregið úr einkennum þunglyndis og kvíða hjá öllum hópum sjúklinga með þessa kvilla þar sem sumir virðast geta nýtt hana betur en aðrir.
Byggt á ítarlegri greiningu á fjölmörgum rannsóknum hafa vísindamenn fundið út að styrktarþjálfun virðist virka best gegn þunglyndi. Jóga og þrekíþróttir virðast hins vegar hafa best áhrif á fólk með kvíða.
![](https://visindi.is/wp-content/uploads/2023/08/samtale-med-psykolog.jpg)
Rannsóknin sýnir að einstaklingar ná bestum árangri með stuttum vikulegum æfingum frekar en lengri.
Aukið serótónín og noradrenalín
Góð hreyfing hefur mikil áhrif á bæði þunglyndi og kvíða. Vísindamennirnir segja útskýringuna vera að hluta til vegna taugasameindaverkunar eins og aukins magns serótóníns og noradrenalíns.
Hjá þunglyndissjúklingum minnkar magn bæði serótóníns og noradrenalíns og því eru þessi taugaboðefni mikilvæg fyrir hamingjutilfinningu okkar og andlega vellíðan.
Eins kemur fram í rannsókninni nokkuð sem kemur á óvart. Fólk nær bestum árangri með stuttum, vikulegum æfingum frekar en lengri æfingatíma. Að sögn vísindamannanna eru styttri æfingar viðráðanlegri fyrir einstaklinga sem eru að berjast við andlegar og jafnvel líkamlegar áskoranir.
„Það er mikilvægt að hafa í huga að ekki virðist þörf á mikilli líkamsþjálfun til að hafa jákvæð áhrif á andlega heilsu,“ segir Ben Singh.