Hljóðfæraleikari spilar á saxófón á meðan læknar skera í heila hans

Afar flóknar heilaskurðaðgerðir eiga sér stað á meðan sjúklingarnir eru glaðvakandi. Bandarískir læknar skáru æxli úr heila sjúklings á meðan hann lék á saxófón.

Maðurinn – Læknisfræði

Lestími: 1 mínúta

Ímyndið ykkur að læknar séu í þann veg að bora gat á höfuðkúpuna, losa um himnur heilans og skera burt krabbameinsæxli, allt á meðan þið eru glaðvakandi.

 

Þessi martröð er raunveruleiki margra sjúklinga, því flóknustu heilaaðgerðir eru framkvæmdar í dag með sjúklingana glaðvakandi.

 

Ein áhugaverðasta aðgerðin átti sér stað þegar Bandaríkjamaðurinn Dan Fabbio blés í saxófóninn sinn meðan á aðgerðinni stóð.

 

Með þessu móti tókst honum að bjarga starfsferli sínum og jafnframt að veita vísindamönnum innsýn í á hvern hátt heilinn vinnur úr tónlist.

Laglína kemur upp um rangan skurð

 

Dan Fabbio er atvinnuhljóðfæraleikari í New York. Hann var 25 ára gamall þegar læknar greindu æxli á stærð við egg í því svæði heilans sem skiptir öllu máli fyrir heyrn og tónlist.

 

Líf hans hefði hrunið, hefðu læknarnir skorið ranglega.

 

Fyrir vikið datt sérfræðingunum við Rochester háskóla í New York í hug að beita nýrri aðferð sem var fólgin í því að láta Dan spila á saxófón meðan á aðgerðinni stóð. Með því móti gæti skurðlæknirinn einfaldlega heyrt ef hann skar of nálægt svæði sem skipti máli fyrir tónlistariðkun.

 

Heilaskurðlæknarnir fengu í lið með sér prófessor í tónfræði og vitsmunavísindum, að nafni Elisabeth Marvin sem fengin var til að semja laglínu sem einungis krefðist þess að Dan andaði létt að sér, því ef andardrátturinn yrði of djúpur gæti heilinn þrútnað út frá höfuðkúpunni.

Söng sig í gegnum aðgerðina

 

Þetta er þó engan veginn í fyrsta sinn sem tónlistarfólk flytur tónverk meðan á heilaaðgerð stendur.

 

Fiðluleikarinn Roger Frisch lék undir þegar læknarnir reyndu að átta sig á orsök skjálfta hans.

Óperusöngvarinn Ambrož Bajec-Lapajne söng hins vegar alla aðgerðina sem gerð var á heila hans.

(Visited 25 times, 1 visits today)

Tengdar Greinar

No Content Available

FULLUR AÐGANGUR AÐ VEFNUM Í 14 DAGA FYRIR 0 KRÓNUR

PRÓFAÐU 14 DAGA FYRIR 0 KRÓNUR