Húðin er um það bil tveir fermetrar að flatarmáli og er eitt stærsta líffæri líkamans og er á sama tíma sannkallað ævintýraland fyrir milljarða örsmárra baktería sem lifa í bróðerni við hlið allt að 40.000 dauðra húðfruma sem yfirgefa líkama þinn á hverri mínútu.
Og þó að þessar upplýsingar einar og sér geti valdið því að þú viljir fara í stríð með sápu og vatn að vopni, þá er full ástæða til að halda aðeins aftur af sér.
Þetta skýrir Jørgen Serup sem er prófessor í húðsjúkdómum og yfirlæknir við Bispebjerg sjúkrahúsið í Danmörku.
Hann hefur verið að rannsaka húð okkar í áratugi. Að hans sögn er mikilvægt að greina á milli hvers konar þvotta er um að ræða ef hann á að geta gefið upp gróft meðaltal af því hversu oft við ættum að fara í góða sturtu samkvæmt vísindum.
Á líkamanum eru milljónir svitakirtla
Líkaminn hefur enga svitakirtla á fremsta hluta getnaðarlimsins og snípsins. Á fótum og höndum eru u.þ.b. 600 svitakirtlar á fersentimetra og í handarkrika og enni eru u.þ.b. 200 svitakirtlar á fersentimetra.
Toppseytnir svitakirtlar
Toppseytnir (rauðir) sitja m.a. undir handleggjum og í kringum kynfæri, geirvörtur og endaþarmsop.
Fráseytnir svitakirtlar
Fráseytnir (bláir) eru alls staðar á líkamanum en eru sérstaklega margir á höndum og fótum.
Sápa afhjúpar frumurnar
Það er mikill munur á því hvort þú sápar þig frá toppi til táar, ferð í bað eða þværð bara sérvalda staði.
Heildarsápun hvers einasta hluta líkamans ætti ekki að gerast of oft, að sögn prófessorsins, þar sem sápa er í grundvallaratriðum efnafræðilega ertandi fyrir húð okkar.
„Náttúrulegt ástand okkar er að við erum með fitu á líkamanum. Sápan fjarlægir fituna og afhjúpar frumurnar. Ef þetta gerist of oft getur það pirrað húðina þannig að hún fer að hegða sér óeðlilega og gerir hana rauða og þig getur klæjað,“ segir hann.
Einbeittu þér að völdum svæðum
Ef þú notaðir aldrei sápu myndi fitan á húð þinni hægt og rólega fúlna og mynda lykt ásamt bakteríunum.
Þess vegna eru ráðleggingar Jørgen Serup einnig að þú breytir á milli mismunandi tegunda þvotta og einbeitir þér að völdum stöðum á líkamanum.
„Sturta á hverjum degi er í lagi ef þú notar bara sápu á þeim stöðum þar sem eru flestar bakteríur – í klofinu, endaþarmsopinu, fótunum og undir handleggjunum,“ segir hann.
„En þú verður að sápa allan líkamann í mesta lagi 1-2 sinnum í viku, annars losar þú húðina of mikið við fitu,“ útskýrir hann.
